Հայաստանի Հանրապետության վիճակագրական կոմիտեում (Արմստատ) տեղեկատվական ռեսուրսների կառավարման և տեխնոլոգիաների վարչության, ինչպես նաև գների վիճակագրության և միջազգային համադրումների բաժնի աշխատակիցների համար ՀՀ կենտրոնական բանկի մասնագետների կողմից անցկացվել է «Տվյալների հավաքագրումը վեբ-սքրապինգ մեթոդով» թեմայով մասնագիտական դասընթաց։

Դասընթացը նվիրված էր ծրագրավորման գործնական հմտությունների զարգացմանը և վեբ-սքրապինգ մեթոդով հավաքված տվյալների մշակման ու վերլուծության գործիքների ուսուցմանը։ Մասնակիցները ծանոթացել են Մեծ տվյալների (Big Data) աղբյուրներից վեբ-սքրապինգ մեթոդով գների վերաբերյալ տվյալների ավտոմատացված հավաքման և մշակման համար լայնորեն կիրառվող Python ծրագրավորման լեզվի հիմունքներին։

Դասընթացի իրականացումը կնպաստի մասնակիցների մասնագիտական և տեխնոլոգիական կարողությունների զարգացմանը, տվյալների հավաքման գործընթացների արդիականացմանը։